Dili, Radio Liberdade Onine_ Iha loron 17/7/2016, tuku 16.20 oras Timor, Veteranu Austalia hamutuk nain 24, to’o Aeroportu Internasional Presidenti Nicolau Lobatu, ho aviaun Airnorth, ne’ebe simu husi Veteranu no Veterana Timor Leste.
“Atu hametin relasaun Veteranu TL no Australia, Veteranu Timor Leste no Veteranu Australia realija Marsa Jornada,” informa Responsabel Komisaun Organijador, Jorge Alves, iha salaun VIP Aeroportu, Dominggu, 17/7/2016.
“Vijita ida ne’e, hanesan ita hotu hatene, Veteranu entre rai rua Timor Leste no Australia, iha tinan tolu tutuir malu, portantu husi 2014 to’o 2016, Veteranu Timor Leste ba tuir seremonia Anzacday, ita hetan karta konviti husi Veteranu Australia sira ba tuir Ceremonia dala tolu ona, entaun vijita ida ne’e, Veteranu Australia mai iha ne’e hamutuk ho Veteranu Timor Leste, atu halo vijita Marsa Jornada, portantu Marsa Jornada ida ne’e atu hametin relasaun entre Veteranu Timor Leste ho Australia, ba rai rua ne’e nia diak,” isplika Jorge.
Jorge hatutan, “ida seluk, Veteranu Australia mai iha Timor Leste tamba istoria ke nungka atu husik malu, ohin Veteranu rai rua hamutuk atu fo hanoin ba Estadu rai rua ne’e nian.”
Veteranu hirak ne’e sei vijita fatin istoriku sira hanesan fatin FALINTIL subar iha momentu funu, no mos fatin sira ne’ebe fatin funu segundu gerra mundial entre Australia ho Japones, tamba ne’e vijita ne’e importante tebes ba povu no nasaun Timor Leste no Australia, dehan Jorge.
Shefi Delegasaun Veteranu Austalia, iha deskursu espresa nia sentimentu katak, “ami kontenti los no oroguluhu los tamba bele hetan oportunidade ne’e, ne’ebe ita bele marka istoria hodi lembra terus ne’ebe ita hotu hanesan, hanesan Estadu, hanesan ema ne’ebe defende Liberdade no hanesan ema ne’ebe forsa laiha, maka infrenta.”
Marsa Jornada sei hahu halao iha Munisipiu Dili, Baucau, Viqueque, Ainaro, Suai no ikus iha Bobonaro, Marsa Jornada sei halao durante loron 10 iha Teritoriu TL iha loron 10 nia laran.
