Dili, Radio Liberdade Online - Prezidente Repúblika, Taur Matan Ruak, promulga Orsamentu Jerál Estadu (OJE retifikativu ba tinan 2016, maski nia sei iha dúvidas kona-ba opsaun hirak ne'ebé hetan fatin iha OJE. Iha nia mensajen ba Parlamentu Nasionál kona-ba promulgasaun OJE retifikativu, dehan katak "investimentu daudaun nian labele sakrifika dezenvolvimentu aban-bainrua nian, liuliu haree ba montante dotasaun orsamentál ne'ebé mak mobiliza tiha ona ba tinan ida-ne'e no mós ba osan ne'ebé transfere hosi Fundu Petrolíferu ne'ebé aas liu duké Rendimentu Sustentavel Estimadu (RSE), inklui mós prioridade sira-ne'ebé mak define iha OJE".
Maski nia iha dúvidas kona-ba opsaun importante liu ne'ebé temi iha OJE retifikativu ba tinan 2016, Prezidente Repúblika promulga ona Dekretu Parlamentu Nasionál nr. 29/III, Alterasaun Dahuluk ba Lei nr. 1/2016 hosi loron 14 fulan-Janeiru, ne'ebé mak aprova Orsamentu Jerál Estadu nian ba 2016, hodi la atraza tan ezekusaun orsamentál ba 2016, liuliu tanba OJE retifikativu hetan ona aprovasaun ho maioria parlamentár. Mensajen ne'ebé mak haruka ba Parlamentu Nasionál, haktuir Konstituisaun nia art. 86 e).
Hanesan Prezidente Repúblika nia dehan "kontribuisaun ba governasaun rekursus ida ne'ebé di'ak liu posivel hodi fó benefísiu ba ita-nia Povu, la'ós de'it iha momentu aprova OJE retifikativu ba 2016, maibé mós iha momentu ne'ebé ita prepara hela OJE ba 2017".
