
Estudante husi suku Fatuhada sujere ba Xefi Estadu, Taur Matan Ruak atu Veta Lei pensaun Vitalisa (LPV) tamba lei ne’e konsidere la fo benefisiu ba Povu Timor-Leste.
Sujestaun ne’e hato’o husi reprezentante estudante suku Fatuhada, Ramalho Augostinho Ximenes , wainhira Xefi Estadu halo dialogu ho Komunidade sira iha suku Fatuhada iha Kinta feira 26/1/17.
“Hau nia preokupasaun konabá LPV, agora dadaun Parlamentu Nasionál halo ona alterasaun , tanba ne’e hakarak husu ba PR promulga LPV ne’e ka lae? maibe ami hakarak husu PR atu veta tiha LPV ne’ebe maka laiha benfísiu ba povu” tenik Augustinho.
Hatan ba preokupasaun ne’e Xefi Estadu hateten núdar ema iha pozisaun polítika nia kontra duni lei Pensaun vitalisa.
“Ita nia lei ne’e halo de tal maneira ne’ebe maju kena mundur kena, lei ne’e iha ona Palasiu. Maibe hau nia pozisaun polítika, katak hau kontra LPV. Tanba iha balu ne’ebe la halo buat ida manan liu fali hau nia gerilleiru sira”
Entretantu LPV oras ne’e dadaun iha ona Prezidenti da Repúblika no ekipa sei haree konaba kontiudu husi lei ne’e rasik hafoin ida ne’e mak Prezidenti foti dezisaun.
