27 Novembru Timor Laran Ahi Naroman Total

Radio, online  –  Ministru Infrastrutura Pedro Lay promete ba reprezentante povu iha Parlamentu Nasional liu husi diskusaun iha komisaun G katak, tama iha 27 de Novembru tinan ne’e Timor laran tomak sei naroman total. Ahi elektrisidade lakan iha teritoriu tomak ne’e atende ba povu tomak iha loron selebrasaun independensia RDTL nian iha 28 de Novembru.

Pedro hato’o kestaun ne’e iha   audensia ho komisaun G Kuarta, (15/6). Lay hatutan,  hodi responde ba ejijensia povu nian ne’ebe mak la satisfas ho eletrisidade lakan mate iha Dili laran nomos iha Distritu sira balun. 

“Tore husi sentral iha Hera no Betano sei heleu Timor laran ita garante ahi lakan total, Timor laran la nakukun ona,”dehan Lay.

Membru komisaun G Parlamentu Nasional husi bankada Fretilin, Inacio Moreira hateten  iha diskusaun ne’e  foka liu koalia konaba orsamento, estrada no elektrisidade  tanba asuntu ida ne’e  hanesan  problema boot nebe afeita ba povo nia moris.

Deputadu Opozisaun ne’e hatutan liutan, iha inkontro ne’e mos  komisaun G hato’o problema  barak nebe durante ne’e povo  infrenta hanesan elektrisidade atu nune’ governu liu husi Ministeiru infrastruktura bele klarifika no esplika nebe loos.

Tuir komisaun G durante ne’e halao aktividade fiskalizasaun iha area rurais, iha fatin barak mak kondisaun  estrada la diak.
Tuir Inacio, prekupasaun elektrisidade ne’e Ministro Infrastrutura Pedro Lay hateten katak, konstrusaun olio pezadu iha sentral Hera no Betano  iha   dia 27  fulan Novembro tinan ne’e ahi sei lakan iha Timor laran tomak.

“Ita hein promesa ne’e, ba hau sei la fiar ba promesa ne’e tanba ahi eletrisidade iha Dili deit to’o agora seidauk rezolve,’dehan Inacio ho pesimista.