Evita Insultu Malu CNE Bolu Partido Politiku

Radion, online - Elisaun jeral besik iha odamatan, 2012. Partido politiku sira komesa halao konsolidasaun dala barak. Maibe mosu insultu malu no kritika malu entre partido. Atu evita ba kestaun la edukativu ne’e Comisaun Elisoes Nasional (CNE) bolu lider Partido politikus sira. Inkontru CNE ho partido politiku sira halao iha salaun imprensa CNE iha Balide, Dili Kuarta, (22/6).

 

Prezidenti CNE Faustino Cardoso hateten, CNE hetan kritika maka’as husi Deputadu hodi regula aktividades partido poltiku sira nia konsolidasaun ne’ebe hanesan fali halo kampanha. CNE sei hetan obstaklu maka lei limitadu fo kompetensia ba iha CNE hodi kontrola.

Presidente CNE Faustino Cardoso hateten katak Kompetensia ne’ebe regula iha lei nomor  5 /2006 kona ba orgaun eleitorais ninian  difini  katak, CNE  regula  kompremento dos prinsipiu kampanha eleitoral  desde  fiksasaun de data  elisaun. Tanba  ne’e Presidente CNE  mak iha direito atu dekreta loron hahu elisaun nian.

“Ita nia lei koalia konaba kampanha  eleitoral iha artigo tolu deit ne’ebe koalia kona ba prinsipiu, durasaun de tempu no  difini kampanha eleitoral,” Faustino esplika.

Tanba ne’e Faustino husu ba lider bankada partido sira, problema ne’ebe akontese entra partido politiku sira laos ida ne’e kabe ba CNE atu hare situasaun . Maibe ida ne’e  tenki resolve estado kompetente wanhira iha tereno hetan infrasoes aktividade partidades ne’ebe tama ona iha kategoria krimi eleitorais.   Ida ne’e  kompotente polisia atu foti medidas.

Entretantu Presidente Partido Demokratiku (PD) Fernando Lasama de Araujo ne’ebe marka inkontru hateten, ba prekupasaun teb-tebes ba paz.  “Ita nia  nasaun atu tama ba  iha elisaun partido politikos sira  komesa konsolida nia a’an, no konsolidasaun ne’e  partido balu halo  hanesan kampanha. Ne’e kontra lei eleisaun nian,’dehan Lasama.

Hanesan Presidente Parlamento Nasional, iha elisaun geral 2012 ne’e tenki ambiente ida ne’ebe respeita  malu no moris hakmatek atu nune’e partido politiku sira  halao sira nia konsolidasaun ne’e  halo ho laran hakmatek.

“Iha elisaun 2012 atu povo ne’e iha duni ambiente ida ne’ebe livre atu nune’e sira mos bele goza sira nia direito atu tuir partisipa elisaun ne’e ho diak,”Lasama espera.

Iha okaziaun ne’e Lasama lamenta ba grupu balu ne’ebe mak sunu bandeira partido FRETILIN. Hahalok ida ne’e bele kria ambiente ne’ebe ladiak tanba ne’e husu ba militantes partido politiku sira atu respeita malu no tenki tau bandeira iha fatin ne’ebe seguru.

Tuir inkontru ne’e, partido sira mak marka prezensa PD, CNRT, Fretilin, PUN, ASDT, PSD. Partido KOTA, PPT no UNDERTIM mak la marka prezensa.