Rebelde M23 hadau Goma, Timor oan 4 iha situasaun kontroladu

Kinshasa, Republika Demokratika Congo – Rebelde sira nebe suporta hosi Rwanda hadau capital provisnia Nord Kivu, Goma iha loron tersa 20/11/12, sira lao tama ba sidade iha fronteira nebe iha ema milaun ida hela ba, forsa ONU nebe iha neba lahalo buat ida.

Tiru malu rebelde M23 hahu desde Sabadu semana kotuk bainhira hetan provokasaun hosi forsa Nasional Congo nian, FARDC.

Testemunha Timor oan nain haat nebe servisu ba misaun dame MONUSCO iha area neba hateten kilat tarutu besik liu tan ba sidade laran iha segunda horseik no rebelde konsege hadau duni Goma ohin.

Bainhira korespondente CJITL iha Kinshasa  liga ba Timor oan nain haat nee sira ho kondisaun diak hotu mesmu ho tauk no kilat no granada no tanque da guerra nia lian bainhira koalia iha telefone.

Oras nee dadaun Timor oan nain tolu hetan ona evakuasaun ba fatin seguru besik Bukavu, no senhor Antonio mak sei hela ikus iha Goma. ONU evakua hotu nia staff civil sira hela deit militer no esencial staff balun.

Timor oan nain haat nemak senhor Anotnio de Oliveira hosi distritu Manatuto, senhor Francisco de Andrade hosi Aileu, senhor Kitu Barros hosi Bobonaro, no senhor Domingos hosi Covalima, Suai.

M23 (March 23) grupu rebelde nebe namkari hosi forma armada Congo FARDC iha fulan ualu ba kotuk, bainhira sira la konkorda konkordasaun nebe sira halo ho Governu Congo iha 2009 nebe integra sira ba forsa FARDC.

ONU nia espertu sira hateten Rwanda ho Uganda mak iha rebelde sira nia kotuk.

Oras nee dadaun media local iha teritoria tomak koalia konaba misaun imposibel ONU nian iha Congo. Nune mos Uganda nebe hetan alegasaun hosi rebelde sira nia kotuk hateten nee failansu ONU nian nebe alega sira.  Arsen Afrika.