Universidade Normal Filipina hakarak kapasita professor Timor oan

Radio, online - Ministru Negosios Estrangeiros no Cooperasaun, Dr. Jose Luis Guterres ‘Lugu’, akompañadu husi Embaixador Timor Leste iha Filipina, Juvencio de Jesus Martins, Direktor Geral Relasaun Externa, João Freitas de Camara no Direktor Nacional Cooperasaun, Francisco Dionisio Fernandes ‘Maukura’ hasoru malu ho Presidenti Universidade Normal Filipina nian, Ester B. Ogema, iha Hotel Diamon, Capital Manila, Filipina, iha (21-02-2013), hodi koalia konaba kooperasaun iha area edukasaun.

Informasun ne'e, radioliberdadedili.com asesu liu husi via email husi media officer MNEC, Joao da Silva husi Filipina.

Presidenti Universidade Normal Filipina, Ester B. Ogema afirma iha sorumutu ne’e katak, sira hakarak halo kooperasaun diak ho nasaun Timor Leste, iha area edukasaun ninian ba kapasitasaun professor sira husi nivel ensino pre-primaria to’o sekundaria (SD to’o SMA).

“Kapasitasaun  ne’ebé maka atu hala’o ba professor sira maka iha material hanesan, Matematika, Fizika, Kimia no lian Ingles,”haklaken Ester B. Ogema.

Iha sorumutu ne’ebé hala’o oras ida nia laran ne’e, Ministru Negosios Estrangeiros no Cooperasaun, Dr. Jose Luis Guterres hateten, lori Governu Timor Leste nia naran agradese ba hanoin diak husi Presidenti Universidade Normal Filipina nian ne’ebé ho antusiasmu atu halo kapasitasaun ba professor Timor oan sira iha nivel hotu-hotu.

Ministru Negosios Estrangeiros no Cooperasaun, Dr. Jose Luis Guterres mós husu ba Presidenti Universidade Normal Filipina nian atu hala’o visita ba Timor Leste iha tempu besik hodi hare situasaun actual Timor Leste nian no mós bele hala’o asina MoU konaba kooperasaun iha area edukasaun nian.

Ministru Negosios Estrangeiros no Cooperasaun Dr. Jose Luis Guterres ho nia delegasaun to’o iha Filipina, iha Kinta (21/02), no tuir programa ne’ebé maka iha, sei hala’o visita kortezia ba Presidenti Republika Filipina, Benigno Aquino III.

Ministru Negosios Estrangeiros no Cooperasaun, Dr. Jose Luis Guterres mós sei hasoru malu ho Ministru Negosios Estrangeiros Filipina, Albert del Rosario konaba kooperasaun bilateral, inkontru ho  estudantes Timor oan iha Filipina no inkontru ho setor privado Filipina.