Radio, online - Ministro dos Negócios Estrangeiros no Cooperasaun, Jose Luis Guterres ‘Lugu’ akompaña husi, Direktor Nasional, Francisco Dionisio Fernandes ‘Maukura’ partisipa Forum Global ba dala 5 iha Vienna, Austria konaba UN Alliance of Civilizations, Tersa (27/02), iha Vienna, Austria.
Forum Global ba dala 5 ne’e, abertura husi, Vice-Chancellor And Federal Minister For European And International Affairs Of The Republic Of Austria, Michael Spindelegger, Secretary-General Of The United Nations, Ban Ki-Moon, President Of UN General Assembly, Vuk Jerenic, High Representative Of The Unaoc, Jorge Sampaio, Incoming High Representative Of The Unaoc, Nassir Abdulaziz Al-Nasser, Foreign Minister Of Spain, Jose Manuel Garcia-Margallo Y Marfil, Prime Minister Of Turkey, Recep Tayyip Erdogan, Emir Of The State Of Qatar, Hamad Bin Khalifa Al-Thani and Federal President Of Austria, Heinz Fischer.
Forum Global ne’e partisipa husi nasaun barak hodi hato’o mós sira nia intervensaun hanesan, Brazil, Indonesia, Saudi Arabia, Finland, Afghanistan, Iran, Armenia, India, New Zealand, Bangladesh, Sudan, Georgia, Alecso, Timor Leste, Belgium, Morocco, BSEC, Germany, Croatia, Latvia, Lithuania, Montenegro, Italy, Thailand, European Union, Ukraine, OSCE, Hungary, Peru, Australia, Bosnia and Herzegovania, Philippines, Council of Europe, France no Switzerland.
Global forum ne’e koalia konaba, sibilizasaun ne’ebé komunikasaun entre kultura no religiaun hodi bele komprende malu, para promove paz no estabilidade mundu nian.
Primeira forum global halao iha Madrid iha tinan 2005, segundu iha Estambul Turkey, terseiro iha Riodejaneiro Brazil, kuatru iha Doha no ba dala 5 iha Vienna, Austria.
Ministru Negosios Estrangeiros no Cooperasaun TL, Jose Luis Guterres ‘Lugu’ ne’ebé hetan mós oportunidade hodi hato’o nia intervensaun haktuir katak, TL nia sibilizasaun hahu mantein komunikasaun entre religiaun no kultura iha TL.
Ministru Lugu mós informa situasaun geral no progressu desenvolvimentu TL nian agora iha area seguransa, defesa, saude, edukasaun, ekonomia, social no mós Timor Leste nia kontribuisaun fo apoio ba komunidade internasional.
Ministru Lugu hatutan katak, TL agora hanesan mós rai ida estabel ona, depois misaun Nasoens Unidas nian remata iha tinan 2012. TL oras ne’e kaer rasik ona nia soberania, hodi halo diplomasia ida ne’ebé bazeia ba nia prinsipiu rasik, ne’eduni TL sei la depende deit ba ajuda internasional.
Maibe, Ministru Lugu haktuir katak, ho mundu ida ne’ebé globalizadu nakonu ho interdependensia, nune’e TL apresia ho Indonesia nia apoio no nasaun ASEAN sira seluk nia apoio, atu TL mós bele integra’an ba regiaun ne’e, hodi sai membru ba ASEAN.
Inkontru ne’e mós, Ministru Lugu hato’o mensagen Presidenti Republika Taur Matan Ruak no Primeiru Ministru Kay Rala Xanana Gusmão nia hanoin iha forum global ida ne’e.
Iha biban ida ne’e mós, Ministru Lugu mós halo inkontru bilateral ho Ministru Negosios Estrangeiros Brazil no mós ho Vice Ministru Negosios Estrangeiros Estonia nian. Iha inkontru ne’e, Ministru troka hanoin konaba relasaun bilateral no kooperasaun entre Brazil ho TL no Estonia ho TL. ***
