EUA apoiu $ 6,5 Milloens ba bolsu estudu Timor oan

Radio Online, fonte Jornál TP - Guvernu Estadus Unidus Amerika (EUA) liu-husi nia Embaixadór iha Timor-Leste hamutuk ho ajénsia internasionál  (AUSAID) lansa programa bolsu estudu ba Timor-Oan (PROBETO) ho montante osan $ 6,5 milloens.

“Edukasaun nudár baze importante ida atu aprende, tanba ne’e Estadus Unidus da America fó oportunidade ba juvetude Timor-Leste sira ne’ebé hakarak eskola iha rai liur atu sai husi nakukun ba naroman,” hateten embaixadór Estadus Unidous Amerika ba Timor-Leste Judith Fergin iha nia knar fatin, Praia dos Coqueiros, Dili (13/03/2013).

Embaixadór ne’e informa katak, bolsu estudu ne’e mai husi sekretária Estadus Unidus America, Hillary Clinton nia inisiativa baihira hala’o  vizita mai Timor-Leste iha tinan kotuk. Tanba ne’e embaixadór Estadus Unidus ne’e husu  ba estudante sira ne’ebé maka remata ona sira nia estudu iha ensinu secundária atu bele partisipa iha bolsu estudu ne’e.

Bolsu estudu ne’ebé oferese husi EUA halai liu ba area financial, konstrusaun manajementu, hospitalidade, agrikultór, bisnis akuntansi, turizmu, Agro bisnis no seluk-seluktan.

Iha fatin hanesan, Vise Ministru Edukasaun asuntu Ensinu Superiór, Marçal Avelino Ximenes hateten, nia kontente ho apoiu bolsu estudu ne’ebé maka Guvernu Amerika fó mai Timor-Oan. Tuir nia ida ne’e importante tebes ba Timor nia Dezenvolvimentu iha futuru.

“Ha’u agradese tebtebes ba Guvernu Amerika tanba bele fó ona nia apoiu mai juventude Timor-Leste atu aumenta rekursu humanu hodi dezenvolve Nasaun foun ne’e,” Marçal hateten.

Tanba ne’e  enkoraza juventude hotu atu partisipa iha bolsu estudu ne’e. nia husu juventude sira keta lakon oportunidade ne’ebé mak Guvernu Amerika oferese.

Iha sorin seluk, Direitór Ajénsia AUSAID iha Timor-Leste, Rick Scott mos husu ba estudante secundáriu sira iha Timor laran atu partisipa iha programa bolsu estudu ida ne’e.

“Estudante ne’ebé mak kompete iha bolsu estudu ne’e, mai husi Distritu  Oe-cusse, Atauro no fatin seluk tan bele mai Aplay” nia dehan.

Iha lansamentu ba PROBETO ne’e partisipa husi membru Parlamentu komisaun F ne’ebé trata asuntu Edukasaun ba asuntu Ensinu Superiór, Embaixadór EUA mai Timor-Leste Directór misaun AUSAID iha Timor-Leste, Reitór universidade sira no profesore sira husi eskola sekundária iha Dili Laran. ***