Radio, online – Sentimentu nakonu ho emosaun husi eis milisia FRETILIN, Santino Vicente Soares wianhira hasoru malu ho jornalista RTP, Adelino Gomes ne’ebe foka milisias sira halo defeza iha area fronteira, Balibo-Bobonaro.
Maluk sira, wainhira hare filmazen iha fronteira Balibo iha neba, milisias FRETILIN konsentra hodi halo defeza. Iha momentu ne’e, jornalista foka hela milisia sira.
Jornalista RTP ne’e husu ba eis milisia FRETILIN, Santino Vicente Soares ne’ebe han hela aifarina, iha momentu neba ho idade 18. Ho lian Portuguesa, jornalista RTP ne’e dehan, O que você come..... eis milisia FRETILIN ne’e dehan..este mandioca...paun de Maubere... dehan hanesan ne’e, milisia FRETILIN sira mak rona lia fuan ne’e hamnasa hotu.
Jornalista Adelino Gomes mai Timor-Leste hetan konvida husi governu, liu husi Sekertariadu Estadu Komunikasaun Sosial hodi sai orador iha seminariu internasional konaba “Regulasaun ba meius komunikasaun sosial harii kultura responsabilidade”.
Liu husi eis milisia FRETILIN, Santino Vicente Soares nia amigu ida ne’ebe akompanha jornalista Adelino Gomes durante iha TL hodi dehan ba Adelino Gomes katak, eis milisia FRETILIN ne’ebe ita intervista dehan mandioca paun de maubere ne’e iha Dili hela. Nia hau nia amigu.
Ho ida ne’e jornalista Adelino Gomes ho laran kontenti hakarak hasoru malu. Liu husi via telefone eis milisia FRETILIN ne’e hakat mai iha iha Otel Timor, Kinta, (22/3) maizumenus tuku 17:15 otl.
Iha hasoru malu ne’e, eis milisia FRETILIN ne’e sente kontenti tebes ho emosaun hodi dehan, parabens ba ita bo’ot nia servisu hanesan jornalista hodi fo sai saida mak akontese iha ami nia nasaun ba mundu, atu mundu mos tau matan ba ami,”dehan eis milisia FRETILIN ho kontenti.
Jornalista Adelino Gomes ho kontenti no hamnasa hodi dehan, sei hanoin hau ga lae? eis milisia FRETILIN ne’e dehan, sempre hanoin no hau hakarak duni hasoru malu ho ita. Ho laran haksolok, Jornalista senior ne’e konvida eis milisia FRETILIN ne’e, ho nia subrinho Eugenio Pereira no Santino Dare Matias ba hemu kafe iha Otel Timor. Iha hemu kafe ne’e fontes ho eis jornalista RTP ne’e dada lia ba akontesementu iha 1975 nian.
Eis milisia FRETILIN ne’e husi Distrito Bobonaro. Agora dadaun halo negosiu fa’an bisikleta iha, Aitarak-laran ho loja naran, Malilait. Parabens...
