Radio online, fontes STL – Diretor Kompania Monte Veado, Ltd, Oscar Lima hateten, emprezariu Internasional ne’ebe mai, tenki emprezariu lolos, labele emprezariu nebe mai kaki lima. Tamba kaki lima iha Timor barak ona.
“Emprezariu nebe mai tenki kredibel atu halo investimentu boot iha ne’e, ita hakarak, tamba tuir hau nia hanoin Prezidenti da Republika Taur Matan Ruak, bolu emprezariu Internasional mai iha Timor ne’e diak liu,”dehan Oscar Lima ba STL, Sabadu (6/4) iha nia knar fatin foin lalais ne’e.
Oscar Lima agradese ba Prezidenti da Republika Taur Matan Ruak, nebe foin lalais ne’e konvida maluk emprezarius Internasional atu mai investe iha TL.
Oscar Lima husu emprezariu nebe investe iha Timor bele koopera diak ho emprezariu Timor-oan atu nune’e osan labele fakar deit ba rai liur. “Tamba osan bele tama ba ema nia bolsu no emprezariu Timor oan sai kiak, ida ne’e mak ami lakoi,”dehan Oscar Lima.
Tuir Oscar Lima, emprezariu Timor oan sira too agora tristi tamba jurus husi banku tomak iha TL nee boot, halo emprezariu Timor-oan susar atu dezenvolve sira nia negosiu. Ne’e duni governu tenki kria lei, nune’e bele kontrola merkadu. Prisimpalmente iha finanseiru, maske banku nudar instituisaun independente, maibe tenki hatun jurus, nune’e labele oho emprezairu Timor-oan.
“Hau hateten kedas tamba banku sira nia jurus boot teb-tebes, no banku sentral seidauk regulariza jurus nebe iha, hau hanoin emprezariu Timor-an bok an mos ladiak,’dehan emprezairu Ermera oan nee.***
