Gazolina rabenta ema ida kanek, uma 3 no kareta 2 ahi han

Radio, online – Ahi buat ida perigozu tebes, kuandu halo reasaun salva mos la hetan. Ida ne’e mak akontese iha Delta IV, Comoro, gazolina rabenta hodi hakanek ema nain 1, uma 3 motuk no kareta 2 motuk iha fatin.

Insidente ne’e mosu Kuarta, (10/4) ahi mosu han uma ho sasan hirak ne’e iha kuaze tuku 11:15 otl.  Insidente ne’e, gazolina toneladas 15, gazoel toneladas 5 no mina rai toneladas 5 mak rabenta.

Tuir Olandina Ili-Mau hanesan nain ba kompaina Tetu Lai ninia laen Manuel Lelo Bere mak ahin han iha nia isin lolon hodi salva ninia kareta, maske nune’e Manuel nia kareta ahi konsege han iha body kotuk nian. Manuel ahin han lori direita kedan tula iha taxi ba Hospital Nasional Guido Valadares hodi tratamentu urjenti.

Kronoligia ba insidente ne’e, tuir Olandina Ili-Mau ba jornalista katak,  mais ou menus tuku 11:10 otl hanesan ne’e kareta truk lori mina atu hatama iha uma. La kleur ahi mosu husi kareta nia mesin. Ho ida ne’e ahi komesa han gazolina iha massa laran no han komesa han ba kareta tanki mina nian.

“Hau iha uma laran, halai sai mai atu foti osan iha gaveta laran la bele ona tamba ahi komesa boot ba dadaun ona. Hau dada sai deit hau nia oan hodi salva husi ahi laran ne’e,’dehan Olandina ho matan ben.

Uma tolu mak ahi han ne’e motuk ne’e, ida loga ba rental nian. sasan siar iha rental laran la aproveita hotu, ahi han motuk.

“Ami nia osan kauze US$5000 mak ahi han no ami feto nia osan mean ne’ebe ami sosa hodi fila-liman mos ahi han hotu. Ne’ebe hau halo konta sasan sira mak ahi han komesa husi kareta uma tolu ho motor ida, ami lakon kuaze US$60.000,”Olandia esplika.

Tuir observasaun jornalista Radiliberdade.com, gazolina rabenta, halai tuir bee dalan hodi atu mai han tan uma sira mak besik iha malu. Maibe ahi konsege han uma sorin ne’ebe faan gazolina ho minarai. La kleur Bombeiros to’o hodi hakalma ahi nia tensaun. Too notisias nee tun, seidauk konfirma Polisia, tamba sei rekoila informasaun hodi halo investigasaun klean.