Radio online, fonte TP – Reprezentante Santa Se Nunsiu Apostolika, Rodrigo Bilbao husu ba reprezentante sarani Parokia Balide atu rezolve disputa rai entre Diosece Dili no Parokia Igreija Balide liu husi dalan dialogu.
Reprezentante sarani Parokia Igreija Balide ne’ebe hasoru Nunsiu Rodrigu maka, Rosalina Dias, Paulo Pereira, Rolando Filipe, Francisco Assis no Jose Almdeia Manuel, iha Kuarta, (10/4) iha Nunsiatura Pantai Kelapa-Dili.
Objetivu hasoru malu ne’e, hodi informa situasaun ne’ebe akontese, nune’e Nunsiu bele apar situasaun ne’ebe mak akontese antes.
“Ami mai para hato’o ba reprezentante Santa Se konaba buat ne’ebe akontese nomos oinsa Nunsiu bele apar ho situasaun ne’ebe mak akontese, nomos oinsa Nunsiu bele rona husi ami no bele mos rona husi Diosece Dili,”dehan Porta Voz sarani Parokia Balide, Rosalina Dias ba Timor Post, hafoin hasoru malu.
Iha sorumutu ne’e Nunsiu la koalia barak, maibe husu atu halo dialogu. Tanba ne’e, sira husu ba Padre Vigariu Parokia Balide Mateus Afonso no Padre Mouzinho Pereira atu fila fali ba hamutuk ho sarani sira iha Parokia hodi halo dialogu, para oinsa buka solusaun.
Alende ne’e, husu ba Padre Rogerio Sekertairu Bispo no Amo Vigariu Jeral Apolinario Guterres atu halo kordenasaun no koalia ho sarani sira atu halo dialogu.
“Ami kontinua respeita nai-lulik no Amo Bispu iha rai ne’e, no ami nia pozisaun sei la kontra Amo Bispo, maibe ami kontra desizaun ne’ebe iha, ami hakatak dehan, Pe. Mateus Afonso tenki hamutuk ho sarani Parokia Balide,”dehan Rosalina.
Paulo Pereira ne’ebe hasoru Nunsiu mos dehan, problema disputa rai halo Pe. Mateus Afonso sai vitima, liliu deklarasaun ne’ebe deklara husi Amo Vigariu Jeral Diosece Dili.
“Ami nia pozisaun iha responsabel tomak ba kazu ne’e, tanba kazu ne’e sarani sira nian, laos Padre nian. Ami sarani mak sei hasoru Diosece. Dalan ida tan ami menegaskan, ami la kontra Igreija Katolika no Diosece Dili, maibe ami kontra desizaun,”dehan Paulo.
Konaba asuntu dialogu ne’e, diariu ne’e tenta hakarak halo konfirmasaun ba Vigariu Jeral Diosece Dili, Apolinario Guterres, maibe Vigariu Jerla ne’e lakoi fo komentairu, tanba iha preokupasaun urjente. ***
