Radio online, fonte Independente - Pogram governu jornal imprime hodi distribui ba iha distritu iha, teritoriu Timor-Leste laran tomak to’o ohin loron seidauk realiza tanba Sekertariu Estadu Komunikasaun Sosial (SEKOMS) sei hein hela jornal balun seidauk priense rekejitus.
Sekertariu Estadu Komunikasaun Sosial, Nelio Isaac hatete, to’o ohin loron sei falta jornal balun mak seidauk kompleta sira nia dokumentus.
Tanba, tuir Nelio katak, governu atu halo kooperasaun ho jornal sira, laos ho individu. SEKOMS hakarak kooperasaun ho organizasaun ka jornal tenki iha baze legal.
“Ita nia jornal sira ne’e barak mak sei iha problemas konaba dokumentus legalidade nian. Ne’ebe hau lakohi halo kooperasaun ho organizasaun ida kuandu seidauk iha baze legal ida,”dehan Nelio Isaac ba Independente iha Delta Nova semana kotuk.
Tuir SEKOMS Nelio dehan, kontratu ba distribuisaun jornal foin hahu bainhira jornal sira iha kompleta ona dokumentus.
“Tanba ita koalia klaru deit, governu lakohi halo kooperasaun ho media ne’ebe ilegal tanba bele hamosu fali problema boot iha aban-bairua,”dehan jornalista senior ne’e.
Programa sosa jornal ne’e hahu iha mandatu governu Aliansa Maioria Parlamentar (AMP) iha tinan 2008 liu husi kooperasaun organizasaun Timor-Leste Press Club (TLPC).
Governu sosa jornal diaria ho semenal mak hanesan Suara Timor Lorosae (STL), Jornal Nasional Diario (JND) no Tempo Semenal (TS). Jornal Timor Post (TP) foin tama iha programa distribuisaun jornal ne’e.
Iha tinan 2010, hafoin jornal STL no JND desidi sai husi kooperasaun TLPC nian, tamba hakarak direita kontinua halo kooperasaun ho governu ba programa distribuisaun jornal. Programa ne’e halao durante tinan ida, (2010-2011). ***
