Radio, online – Organizasaun Naun Govermental (ONG) Haburas ne’ebe hare ba ambiental iha Timor-Leste, fo korazen tebes ba loron Mother Earth Day (loron mundial ba inan rai) ne’ebe monu iha dia 22 de Abril.
Iha komemorasaun ba loron ne’e, Haburas liu husi Movimentu hadomi natureza halao aktividades marsa hili foer no halo orasio konaba funsaun rai nian iha Largo Lecidere, Segunda, (22/4). Tema ba selebrasaun Mother Earth Day “Ita ema mak tenke fo valor ba funsaun rai”.
Koordenador movimentu hadomi natureza, Gil Horasio ba jornalista hateten, objetivu halo marsa hili foer husi Palasio Prezidenti liu husi tasi ibun to’o iha Palasio do Governu.
Objetivu marsa hili foer hodi hamosu inisiativa luta ba defende direitu ba rai no oinsa mak fo hanoin ba publiku atu fo valor ba funsaun Rai ne’ebe fo benefisiu ema nia moris.
“Ami halo aktividade ne’e atu husu ita nia partisipasaun hodi bele halo aktividade hanesan limpeza jeral hodi ambiente saudavel nafatin,”Gil Horasio hateten tan katak .
Iha okaziaun ne’e, Haburas husu ba governu atu haforsa lei liu husi sistema kontrolu ne’ebe diak, liliu ba atitude estraga ambiente. Labele hare deit ba prosesu dezenvolimentu, maibe dezenvolimentu fo mos vantazen ba aspeitu natureza.
Diretora Rede Ba Rai, Santina Fernandes hateten, hare ba prosesu dezenvolvimentu rai nia valor komesa atu menus, hanesan iha Dili laran rai mamuk atu kuda aihori hodi fo is ba ita ema komesa menus, tamba fui alkatraun no sementi hotu. Alende ne’e mos udan tau rai, udan be la mout ba rai okos. Ho kondisaun hanesan ne’e mak hamosu inundasaun.
“Husu ba ina feto sira katak selebrasaun loron Internasional ba inan Rai ( Mother Earth Day ) ne’e tamba rai mak ita nia futuru, Rai mak Ita nia moris, Rai mak ita nia kultura, Rai mak ita nia dignidade, Rai mak ita nia Identidade no Rai mak ita nia nasaun tamba ita esplora ita nai rai doben ida ne’e hanesan mos ita esplora ita nia inan doben rasik,”Santina esplika.
Diretora Rede Ba Rai, husu ba maluk sira atu lalika soe foer arbiru. Soer foer tenki iha nia fatin, se soe foer arbiru ba rai, ne’e hatudu katak, la respeita inan doben rai ne’e rasik .
Hola parte ba selebrasaun Mother Earth Day partisipa husi eskola Primaria to Universitario inkliu komunidade distritu Aileu, Ermera, Cova-Lima no Dili. Nomos iha espanduk ida hakerek ho nia titulu “Hasae rezilensia hasoru alterasaun klimatika”.
Iha lokraik tuku 16:00 otl, ONG internasional Fundasaun Asia halao akitividade hanesan darama, pintura no pameran ba komemorasaun Mother Earth Day. Pitura ne’e hetan animasaun husi sentru aprendisazen Santa Maria, Dili.
