Krizi aimoruk, loron ida ema nain tolu mate iha HNGV

Radio online, fonte JND – Parlamentu Nasional, sei bolu Ministru Saude atu ba esplika sistema jestaun no ezekusaun Orsamentu Jeral Estado, tamba iha Hospital Nasional Guido Valadares, (HNGV) krizi aimoruk ne’ebe pasiente loron ida, ema nain tolu mate dala ida.

“Hau foin simu SMS husi infermeiru sira husi HNGV katak, oxigem iha ne’eba laiha ona, aimoruk tensaun alta laiha nune’e pasiente ne’ebe pasiente sira mak halao tratamentu iha hospital Nasional ne’e lron ida ema nain tolu mak mate,”dehan Deputadu Francisco Branco husi bankada FRETILIN iha plenaria Segunda, (22/4).

Deputadu bankada FRETILIN ne’e hatete, PN sei bolu Ministru Saude, Sergio Lobo ho urjenti atu mai esplika jestaun hospital Nasional nian, tamba ne’e bele halimar ba ema nia vida.

Nune’e mos Deputadu FETILIN, Aurelio Freitas Riberio rona rasik mos husi infermeiru sira husi HNGV dehan iha Departamentu Radiolojia ne’ebe atu hasai raiosix (X-ray) tinta laiha, buat hotu-hotu laiha, maibe Ministru Suade bandu funsionariu sira atu la bele fo informasaun ba media tan ne’e mak ema la hatene.

Aliede ne’e, Deputadu Virgilio Ornai husi bankada PD mos kestiona ba problema Ministeriu Saude ninia jestaun no programa.

Tuir nia, agora dadaun preokupasaun bo’ot ba Distritu sira mak kareta ambulansia laiha, nune’e mos distritu balun iha ambulansia maibe mina laiha atu tula moras sira sub-disritu mai Distritu nomos husi distritu mai kapital Dili.

Deputadu PD ne’e mos lamenta tebes ho sistema ida ihan Hospital katak, wainhira pasiente ida ba halo tratamentu, infermeiru dehan aimoruk ba moras ida ne’e laiha, maibe fo ruzukan katak, aimoruk ne’e iha apotik mak iha. Ida ne’e sistema at no uza aimoruk estadu nian atu ba halo bisnis karik? Presiza buka hatene.

“Hau husu atu ita hare didiak ba kazu aimoruk laiha, maibe iha apotik aimoruk barak hela. Estadu aimoruk laiha maibe kompanha aimoruk barak liu fli estadu nian,”Virgilio kestiona.***