Radio, online – Opiniaun ne'e ninia kontiudu tomak responsavel husi hakerek nain no instituisaun. Redasaun fo pasu menu ne'e hodi ejerse ema no instituisoens nia hanoin no ideias konaba asuntu ruma ba prosesu dezenvolvimentu Timor-Leste.
Tinan 14 liu ba, ohin 27 Agostu 2013, hanoin hikas fali istoria akontesimentu momentu iha loron 27 Agostu-1999, Pro-Milisia Jakarta, Polisia Republik Indonezia (POLRI), no Tentara Nasional Indonesia (TNI), halo atake ba iha Suku Tapo/Memo, Sub-distritu Maliana, Distritu Bobonaro.
HISTORIA BADAK MASAKRE 27 AGUSTU 1999 IHA SUKU TAPO/MEMO
Iha loron 27 Agustu 1999 mais ou menus tuku 1:30 loraik Oras Timor-Leste, militar Indonézia no mílisia pro-otonomia sira husi kapital Maliana hodi hala’o asaun komvoi (kampanye pro-otonomi) mai iha suku Tapo/Memo, maibe antes ne’e sira iha ona planu atu harahun suku ida ne’e ho razaun katak populasaun iha suku Tapo/Memo 99% Pro-Independensia i ami nia suku ne’e rasik sai mos risku mean ba pro-otonomista sira iha distritu Bobonaro.
Tamba ho sira nian intensaun a’at hirak ne’e to’o iha ami nian suku sira hotu-hotu tun iha kareta hodi asalta ami, iha tempu ne’eba populasaun tomak iha unidade hamrik hasoru sira nia asaun violensia ne’ebé maka kontra ami i momentu ne’eba ami konsege defende ami nia a’an hodi sunu sira nian kareta sia (9), no motorizada tolu (3).
Buat hirak ne’e hotu maka sai referensia ou sasin ida mai ami hodi bele Estadu RDTL rekoñese mos ba masakre ida ne’e, maibe iha tempu ne’eba ami nian ema joven ida, no ami nia ema katuas ida militar Indonezia no milisia pro-otonomia tiru mate iha fatin, i ema nain tolu (3) seluk kanek todan.
Ida ne’e maka historia badak ne’ebé akontese iha ami nia suku Tapo/Memo rezulta ema mate, kanek todan no lakon nia uma inklui sasan hotu.
Hakerek Nain Servisu iha ONG Fundasaun Mahein (FM)
Tapo/Memo-Maliana, 27 Agostu 2013
