Diskursu husi Prezidenti Republika Taur Matan Ruak iha serimonia prestasaun onras funebres ba martires ba libertasaun nasional

Radio, online  -  Opiniaun ne'e ninia kontiudu tomak responsavel husi hakerek nain no instituisaun. Redasaun fo pasu menu ne'e hodi ejerse ema no instituisoens nia hanoin no ideias konaba asuntu ruma ba prosesu dezenvolvimentu Timor-Leste.

Metinaro, 7 Dezembru 2013 Famílias no amigos husi Herois ba Libertasaun Nasionál Povu Timor Lorosa’e Ohin, 7 de Dezembro 2013, ita Komemora ba dala tolu nulu resin wualu mak Forcas Armadas Indonesia invade hodi ocupa ita nia rain iha tinan ruanulu resin hat nia laran liu ba.

Ohin mos,iha fatin ida ne’e, ita nia povo no nasaun fó honra ba herois no martires ba libertasaun Nasional atus resin ne’ebe fo sira nia vida hodi sosa ita nia liberdade no independencia. Serimónia ida ne’e hanesan serimónia boot ba dalatolu ne’ebé ita halo hodi fó onra ba martires no herois sira.

Ita-nia rai hakru’uk ba memória asuwa’in sira ne’ebé fó kontribuisaun maka’as ba Nasaun nia vitória. Asuwa’in feto no mane sira-ne’e sakrifika sira-nia an duni hodi ohin ita bele harii ita-nia futuru ida ho dignidade no respeitu ba Direitu povo tomak iha nasaun doben ida ne’e.

Ita-nia feton no maun-alin sira-ne’e mai horik hamutuk ho kompañeiru sira seluk hanesan saudozu Francisco Xavier do Amaral, Nino Konis Santana, Ular no sira seluk ne'ebé deskansa ona ba rohan laek iha Jardim dos Heróis, Metinaro.

Omenajen nasionál ida-ne’e no serimónia sira seluk ne’ebé ita halao tiha ona, hatudu duni ita-nia reconhecimento ba sakrifísiu ita-nia feto no maun-alin sira ne’ebé mate iha funu laran. Asuwa’in sira ne’e ninia klamar akompaña ita nafatin hodi fó kbiit mai ita atu serbisu nafatin hodi hadi’a kondisaun moris iha ita-nia rain doben.

Prezidente Repúblika agradese ba família sira hotu ne’ebé husik ita nia doben asuwa’in sira ne’e, atu mai horik iha Jardim dos Herois – Metinaro, hamutuk ho Herois sira seluk ne’ebe horik uluk ona iha fatin ida ne’e. Ba faluk, oan kiak no familias asuwa’in sira nian, ita tomak nia domin. Povo no nasaun sei lahaluha imi. Maluk Timor Oan sira tomak.

Asuwa’in sira ne’e sakrifica an ba kauza ida: serbí ita nia Povo no Nasaun. Omenajen nasionál ne’ebe ita fo ba asuwa’in sira ne’e, hatudo duni katak povu no nasaun la haluha sira nia kontribuisaun hodi soi independénsia ita nia rain ninian.

Sira mate atu ita bele moris iha paz no segurança iha ita nia rain.  Sira mate atu ita bele hari nasaun ida ne’ebé respeita Direito no dignidade Timor Oan sira nian. - Sira mate hodi fo sira nia vida ba independencia tanba mehi hari futuro ida ne’ebe kmanek iha ita rain doben Timor Lorosa’e. Sira-nia sakrifísiu la saugati. Ita nia rain ohin, sai duni nasaun ida ne’ebe livre no independente. Iha direitu no dignidade hanesan mos nasaun sira seluk iha mundo rai klaran.

Honra no gloria eterna ba memoria ita nia saudoso sira nia.

Prezidenti da Republika, Taur Matan Ruak