Radio, online – Deputada Maria Lourdes Bessa husu ba komisaun B atu halo re-eleisaun, tanba iha eleisaun foti Deputadu David Ximenes hanesan jogadas politika ida ne’ebe la justu no kontra valores demokratiku.
Foin lalais ne’e eis Prezidenti Komisaun B ne’e hasoru malu ho Prezidenti da Republika, Taur Matan Ruak hodi informa konaba asuntu ne’e. Alende ne’e mos deputada husi PD ne’e hatama karta hodi husu komisaun B halo re-eleisaun.
“Ohin hau mai, informa ba Prezidenti da Republika konaba foin dadauk akontese Komisaun B, Parlamentu Nasional ne’ebe mosu jogagas politika no kontra valores demoktratiku,’dehan Maria Bessa ba jornalista.
Maria Bessa hatutan, iha mudansa ba strutura komisau B nia laran, Maria simu maibe maibe kestaun ida iha prosesu halo mudansa mak lao ladiak.
“Eleisaun ne’e politika mak intervein iha prosesu eleisaun. Ne’e jogadas politika, atu justu ka la justu nunka hare ba ida ne’e. Hare ba oportunidade no hare ba situasaun,”informa Maria Bessa.
“Ne’ebe justu ka la justu hau labele halo komentariu, maibe situasaun hanesan ne’e duni. Hau informa deit katak, hau simu, see laiha ona konfiansa ona ba hau. Hau labele impoin hau nia prezensa”.
Maria Bessa fo kronolojia ba kazu jogadas politika iha komisaun B, ne’ebe akontese iha dia 11 de Dezembru foin lalais ne’e katak, mainhira Maria Bessa sai iha 10 minutus nia laran deit, lista mosu kedas, tau Deputadu David Ximenes nudar prezidenti.
Alende ne’e mos, Deputadu David Ximenes no Duarte Nunes ejiji halo kedas eleisaun, iha situasaun Prezidenti Maria Bessa laiha. Deputadu nain walu (8) mak vota ho sistema foti liman no hamrik (aklamasaun) hodi foti David Ximenes sai Prezidenti Komisaun B.
“Prosesu ki’ik oan ida ne’e deit mak hau la simu, tanba ba hau mos iha direitu atu partisipa iha eleisaun. Tanba atu Prezidenti ka la Prezidenti, hau membru efektivu nafatin iha komisaun. Hau la simu mak hau nia votu laiha,” Maria kestiona jogadas politika husi partido CNRT ho Fretilin iha komisaun B.
"Hau hasoru malu ho PR Taur Matan Ruak hodi informa asuntus ne’e, PR Taur simu mos pedidu Maria Bessa atu reve ba prosesu eleisaun, atu nune’e Prezidenti Komisaun B foun mai iha legalidade no integridades.
Tanba iha prosesu eleisaun foin dadauk ne’e, Maria Bessa dehan, la abadona komisaun, maibe sai hodi fo tempu para atu hakerek akta no prepara lista.
Maske Deputadu David Ximenes nudar Prezidenti Komisaun B, maibe bankada Fretilin laiha koinesementu konaba asuntu ne’e. Bankada Fretilin iha III lejislatura ne’e hola pozisaun politika katal sei la xefia kualker komisaun.