Radio, online – Major Jeneral F-FDTL, Lere Anan Timur iha konfiansa bo’ot katak, iha tranferensia jerasaun tuan ba jerasaun foun hodi lidera nasaun ne’e, fiar katak figura hanesan Kay Rala Xanana Gusmao foun sei mosu mai.
Agora dadaun PM Xanana ho Mari Alkatiri no Jose Ramos Horta iha planu mudansa politika hodi buka jerasaun foun atu lidera nasaun ne’e ba oin. Lere dehan, poder laos buat privadu. Poder ne’e ba Timor oan tomak no povu hotu simu.
“Hau hanoin ida ne’e ita tenki prepara ita nia jerasaun foun, esperiensia boot ne’ebe mak ami hetan iha funu laran, uluk funu ita temi deit mak ita nia Saudoso Nicolao Lobato, depois mosu fali Xanana hodi lidera funu. Xanana ema kaer ita hanoin lakon funu, maibe funu lao nafatin no ita hetan ukun-an. Entaun hanesan mos agora ita labele laran metin deit ba jerasaun tuan, jerasaun foun tenki prepara kedas agora,”Lere akredita.
Lere fiar katak, jerasaun foun bele jere nasaun ne’e. “Xanana ba tia komarka Xanana foun mosu mai, Agora Xanana katuas ni rejigna an, mosu fali Xanana foun mai iha nasaun ne’e, hau hanoin ita problema la iha”.
Lere mos tau kestaun ba mentalidade, konaba problema mentalidade, ne’e laos fasil atu muda mentalidade ne’e sai lalais. Mentalidade ne’e esforsu tomak, atu sai lideransa tenki mudansa.
Inkontru ho Prezidenti da Republika, Taur Matan Ruak, hanesan inkontru iha semana-semana. Iha sorumutu ne’e General fitun rua ne’e informa konaba situasaun forsa ninian, situasaun rai laran, servisu forsa ninian no asuntu sira seluk.
“Ita nia kutura hanesan Katolika tama Natal ho simu tinan foun hau hakarak hato’o hau nia boas festa santo natal 2013 i Feliz de anu novo 2014 lori rahun diak ba ita dame, Domin ba ita nia rai Timor loro sae,”dehan Lere ba jornalista Kuarta, (18/12) wainhira remata enkontru ho PR Taur Matan Ruak iha, Aitarak Laran, Dili.
Major Jeneral ne’e mos lamenta tebes hahalok Xefi suku balun lori formulariu testu tama forsa F-FDTL nian fo deit familia ne’e hamosu familiarizmu.
“Ita Timor ne’e ukunan tina sanulu resin ona, ita nia mentalidade Indonesia mak nafatin. Hisuk ba ami katuas sira mate hotu mak mentalidade foun tama, depois mak ita hadia. Iha xefi suku balun ninia alin tinan liu tiha ona mos inventa tun sae, depois mak mak halo ita nia ulun fatuk moras, gasta deit osan,”Lere lamenta.
Lere mos husu atu halakon hahalok KKN presiza ema hotu nia pasrtisipasaun no kontribuisaun. Lere mos husu atu justifika presiza iha faktus, ne’e importante.
“Ita nia kazu korupsaun ita rona fo sai ne’e barak los, maibe foin ida deit, hau nia iann Lucia Lobato tama komarka, sira seluk ba ba nebe? Ida ne’e ita hotu presiza hatene,”Lere espresa.
Lere hatutan, razaun fo formulariu liu husi xefi suku sira tanba, xefi suku sira mak besik liu povu ho joven sira. Komando sei la fahe formulariu to’o iha sukus tanba, kareta mos oituan ,ema oituan, estrada at.