Radio, online - Primeiru Ministru PM), Kay Rala Xanana Gusmão fo perdua ba jornal Idependente. PM Xanana nia kritika laos ba buat at ida, maibe hirus ne’e hanesan aman ida hanorin nia oan atu aprende servisu ho professional no responsabilidade.
“Ba Idependente hau simu sira, rekoinse sala ituan, hau hirus tanba ita haka’as an hela ho Australia maibe provoka fali problema ho ita. Hau husu ba Independente ka media diario no seluk tan imi hotu hanesan, ita sei dudu nafatin ba oin tanba buat ne’e diak hodi bolu atensaun ba ita atu hadia an tanba hau mos uluk jornalista,” dehan PM Xanana ba jornalista iha Airoportu Internasional Nicolao Lobato Comoro Dili, Sabadu (21/12), wainhira fila husi Thailandia.
Eis Jornalista iha 1975 dehan, PM Xanana hirus no husu povu atu lalika sosa jornal Independente ne’e lalos, no nia husu ba povu sira no kliente tomak atu fo konfiansa ba nafatin ba jornal Independente hodi hadia sira nia aan sai professional liutan.
“Hau dehan ba povu lalika sosa ona jornal ne’e lae, maibe hau husu nafatin ba imi (media) hotu kurizi aan nafatin, tanba loron ida iha konfresu hau dehan, hau ladun lee jornal, hau ladun nonton TVTL, ita hadia aan nafatin tanba prosesu sei naruk,” nia informa.
PM Xanana mos hato boas festa santo natal no tinan foun ba Jornal Independente tomak hodi servisu professional liutan iha tinan foun 2014 ne’e.
Sei Haruka Jornalista Ba Eskola
Parte seluk, Xanana dehan liu husi kongresu nasional jornalista nebe halao ona nia sei hein Sekretariu Estadu Komunikasaun Sosial no Media sira atu hato proposta ida ba nia konaba formasaun professional ba jornalista iha rai liur liu husi fundus dezenvolvimentu kapital humanu.
“Agora ne’e imi nia rezultadu kongresu seidauk fo mai hau hodi hanoin katak, atu haruka imi ba formasaun ne’e, hau seidauk hare,” nia informa.
Xefi Governu hatutan, bainhira proposta ruma tama, governu iha obrigasaun atu forma rekursu media sai professional.**